Oleh: AHMADI SOFYAN
Penulis Buku/Pemerhati Sosial Budaya

DAK Bangka dak Belitung, akher e urang laen yang nguros kite ne. Mesege kite ne galek e, asak bekelai gati sesama kite lah. Disebut budu nya nggak, disebut bagak nya ngamok. Boh nya, ko lah mulai judes ne.

====

KALI ne ko sengaje nulis pakai bahase Bangka. Ko yaken Penjabat Gubernur sekarang ne dek akan ngerti mace tulisan ko ne. Megeh lah, ade muah anek bueh e urang Bangka yang kek nerjemah e. Tapi, awas pulik salah nerjemah e, sebab ne bahase & cara made e pakai logat urang Mendobarat. (Pok ya tau dak kek Mendobarat ya Pak Pj). Maklomlah aok, kite urang Bangka ne banyek umon bahase kek logat e, nampek tiap kampong bebeda mesege. Ya lah hibat kite ne, tapi asak kek beteco wai bahase e, keluar gale. Dari mulai bahase zaman Akek Antak duluk e tekeluar gale. Tapi asak kek besatu, susah umon, akhir e urang lain nguros kite ne.

Serumpun Sebalai, Serumpun Tapi Bekelai
NE ko nek madeh kek ikak bahwa lah bagus muah orangtua kite duluk e muat slogan Bangka Belitung ne waktu diperjuangkan jadi Provinsi. Orangtua kite duluk e hibat benar, bersatu padu mereka berjuang bier memisahkan dari Sumatera Selatan, bier kite ne pacak nguros umah kite sendirik.

Lalu, slogan kite pun bagus umon, Negeri Serumpun Sebalai. Tapi…, entah ngape hal e, tingkah laku kite urang Bangka kek Belitung ne ukan Serumpun Sebalai, tapi saling Nyerambun dan Bekelai atau Serumpun tapi Bekelai. Boh, ko lah mulai judes ne, mesege lah gerigit ati ase e. Untong tengah bulen Puasa, mun dak ko gigit ko bilong ikak. Bier cem bilong Evander Holyfield waktu digigit kek gigi Mike Tyson luk e. Nak ya mula ko ne, ibarat kata ruwah Mak ko duluk e, “Saya ini lain urangnya”.

Nak ne aok, kite ne mun soal SDM urang Bangka kek Belitung luar biase bagus umon. Dari zaman Akek moyang kite duluk e. Banyek muah dari zaman luk sampai sekarang urang Bangka kek Belitung yang jadi urang hibat. Ase e dak teritong agik lah. Ade yang jadi Menteri, Dirjen, Artis, Urang Kaya sampai punya pesawat, ASN di pusat, sampai bandit ge banyek dari urang kite ne. Tapi akher e dak sikok aben ase e yang kek ngenyatu kite ne.

Ko sebagai urang mudak, kadang gerigit ati umon, asak nek ngaroh ngerik. Ngape ge kite ne dak besatu, sutek kek beteco dak keruan jatak, sutek kek nginger kiyun kene, tapi akher e urang laen yang dapet untong e. Yang dirik ukan dapet untong, cuma mutek puntong rukok bekes urang akhir e. Nauzubillah min dzalik.

Bier Negeri Serumpun Sebalai ne benar-benar bagus, rukon, dak nue igak beteco, nek adelah urang yang pacak menyatukan kite ne. Mun cem ne teros, asa-asa e kek nangis anak cucuk kite kadep ne. Mane nek bekebun ge lah susah. Tanah mana ade e rajen pek tauke, mun ade sisa e berubeh jadi lubang camui. Pacak-pacak budak dak sekulah agik. Udah e yang sekulah tinggi-tinggi diluar, nggak agik pulang ke Bangka Belitong ne karena lah dak de agik urang dirik yang punya kekuasaan di negeri sendirik.

Kirak e para tokoh-tokoh, pacaklah kite kumpol dan menyatukan kite sesama urang Bangka kek Belitong ne. Jadilah kirak e kita zaman duluk e dak nyamen aben dibaweh kekuasaan urang luar. Kite nek banyek introspeksi diri aok, banyak umon dak keruan gawi kite sesama urang Bangka kek Belitong. Along lah kite same-same ngebangun negeri kite ne. Gaduh-gaduh dikit dek hal, asak jen bekelai kiyun kene dak keruan jatak. Laen uman e tengong urang. Kek teberangket Atok kek Nek kite beng lubang kubur nu, gara-gara gawi kite.

Pj. Gubernur, Ko Dak Kenal Aben!
Waktu Ayak Ridwan Djamaluddin diangket jadi Penjabat (Pj) Gubernur kite, banyak urang ingen, tapi banyek juga urang dak ingen. Bahkan sampai akher jabatan beliau ya, urang ASN di Pemprov e ngemalu beliau, pelantikan ge pacak dak jadi. Dak memuyiz muah gawi e. Ngemalu urang Bangka Belitung.

Gawi-gawi cem ne lah akhir e di media ramai urang beteco. Kite beteco sesame kite lah, bahkan ade budak betato dari Toboali nek ngedemo dan nek nguser Ayak Ridwan Djamaludin yang asli urang Mentok Bangka Barat keluar dari Bangka Belitong. Dak mumayiz tingket budu bagak muah asa ko gawi cem ne. Padeh kek anak cucu, jen aben diikot gawi cem ne aok. Nek inga dikit kata ruwah Mak ko duluk e kite idup beng dunia ne.

Nah, sekarang ne, lah ade kaber e Pj.Gubernur kite yang baru. Aok apa kan nya??

Tapi sumpah demi Allah ko dak kenal, dak suwah nenger nama e, dak suwah setempoh kek urang, dak suwah nengong muka e. Nenger nama ge baru sekali ne lah dan gati salah ko nyebut nama e. Makanya ko dak nek nulis nama e, ko takut salah. Ayak ya bida umon asa e nama e. Dak de di kampong kameny nama cem ya mesege. Jadi ko susah nyebut e.

Ko terus terang bae kek ikak aok, bener-bener ko dak kenal aben kek urang hibat dari Pusat ne. Maklomlah, dirik ne banyek tinggel beng utan, jareng umon mace kuran. Kadang sekali mace kurang, kebalik pulik kuran e. Kadang dak mace berita aben, tapi ngesac gamber mentinak cikar beng koran e. Boh…..

Mun ko dak salah denger, kaber e Pj. Gubernur ne urang hibat dari Sumatera Selatan yang begawi di Jakarta. Arti e urang hibat imang uman e mun lah begawi nampek Monas nu. Mesege ko ne lom suwah aben nengong tuncol Monas, kecuali dari gamber-gamber kek dari tivi. Yoo lah kirak e ade rezeki ko diajek kek Pj. Gubernur yang baru ne gi nengong Monas. Mesege Ayak Ridwan Djamaluddin duluk e asak ngajak ngupi cuma di Tungtau Semabong, cube duluk waktu agik jadi Pj. Gubernur, ajak ko ngupi pek Monas nu. Suwahlah agik diperpanjeng jabatan e. Boh, lah mulai ngeracau ko ne ngumong e.

KARENA ko ne dek kenal aben kek Pj. Gubernur yang bare ne, maka ko cuma nek madeh kek Pok ya. Pacak-pacak lah mawak diri di kampong kameny ne. Kata urang duluk e, dimane bumi dipijek, disitu langet dijunjong. Mun sempet, belajir tentang budaya, adat istiadat & karakrer urang Bangka kek Belitong. Udah e bagus-bagus lah keringol e asak beradep kek masyarakat. Jangen aben masem rai e, dak kawan dikantet Mencadin kek Mawang. Pokok e kameny ne posisi e, nerimak dak nerimak, pok lah jadi pemimpen di negeri kameny ne. Asak bagus kameny dukung, asak jiyet kameny keruce. Mun dikeruce Pok jen merajuk dan ngulon bekalai, along begagit agik e. Mesege kameny urang Bangka Belitong ne ingen asak kek Begagit. Kadang antu rimbek, mawang & mencadin ge kameny ajek begagit.

Nak ya lah duluk aok Pak Pj. Gubernur. Ko lah agak linot, nek tiduk luk. Inti e, nek banyak belajir. Jen aben ibarat kata urangtua kameny duluk e: “pinter dak ngajir, budu dak belajir”. Ibarat ladang, di Bangka Belitong banyek jenis Belaleng. Ade belaleng yang terbeng e pelikas, ade yang suara ketikan kaki kek kepak e nyaring, ade belaleng ude-ude tapi pacak ngigit bende beng serual cem kek tungau. Ade juga belaleng Kecadak, garang mese ne. Pokok e cem ya lah asa ko. Pok ya uran pinter, pasti paham lah.

Nah, yang terakher ne aok, ukan nek ngajir baye berenang. Pok pacak-pacak lah nengong ayak-ayuk kameny ASN di Pemprov. Mana bagus Pok beri kesempatan mereka hibat, mana jiyet Pok padeh. Nek tau aok, banyek penjilet mesege pek siya. Sedangka urang-urang yang galek ngeruce cem kameny ne, maupun para tokoh-tokoh Bangka Belitung. Asak Pok bec, insya Allah kameny pon bec dan ingen. Nak ya bae aok. I thinks it’s ok.. (boh, bahase amang-amang Inggris ko ne). Maklom bae lah, isik baden ko kurang nganta, asa-asa gelugud lah berape ari ne.

Salam Gelugud!(*)